تئللي سازين

مجليسلري آباد ائيلر،

نه گوناهي تئللي سازين؟

ملول كؤنوللر شاد ائيلر،

نه گوناهي تئللي سازين؟

يئكي شجر، يئكي دمير،

آرا وورمور، يالان دئمير،

آند ايچمه‌يير، روشوت يئمير،

نه گوناهي تئللي سازين؟

فيكريني وئرمير قله‌مه،

ظولوم ائيلمير عالمه،

پولونو وئرمير سله‌مه،

نه گوناهي تئللي سازين؟

يولدان چيخيب، يولون آزمير،

ايبليس كيمي آرا پوزمور،

موللا كيمي جادو يازمير،

نه گوناهي تئللي سازين؟

موسا وصفين سؤيلر سازا،

روح وئرير گلينه، قيزا،

اوخشامير او شئييدبازا،

نه گوناهي تئللي سازين؟

ككليك
باهارين گۆلشن چاغيندا،
نه اوْخورسان، سوْنا ككليك.
اوْخودون گلدين خوْشوما،
ياشاياسان سن، آ ككليك.
ككليك مسكن ساليب داشا،
سۆرمه چكيب گؤزه، قاشا،
بۇ دؤورانين گئتمز باشا،
اوْوچو گلدي، سين، آ ككليك.
مۇسا سؤز دئير دسيله،
ككليك اؤتور هوسيله،
ائله اوْخودون سس ايله،
جۇشا گلدي سينه، ككليك.

زودلو اوستا عبدالله

(1865-1943)

گرايليلار

گليرم من

آلا گؤزلو، نازلي ديلبر

دئدي: دور گئت گليرم من.

دئديم: آي قيز، درديم چوخدو،

دئدي: درمان بيليرم من.

گؤلدن اوچوردوم سوناني،

بو يئرده قويدوم بيناني،

گونده گؤردويوم جاناني،

گؤرمه‌ينده اؤلورم من.

باغچالاردا باريم اولا،

آلما، هئيوا، ناريم اولا،

بير درد بيلن ياريم اولا،

اونا قوربان اولورام من.

وفاسيز اولماز يالانين،

آغلي اولماز چوخ گوله‌نين،

عبداللهيام درد بيله‌نين،

يوز ايل كئچسه قولويام من.

موْللا جۇما

(1854-1920)

گرايليلار

قاباغيندا

ايسمي-پۆنهان يازيليبدير،

ايسمي ازم قاباغيندا.

قندي-شككر ازيليبدير،

اوْل سنين بال دوْداغيندا.

اينجه بئلين سۇراهلانير،

خۇمار گؤزون گۆمراهلانير،

بَياز خاللار فرحله‌نير،

گۆله نيسبت ياناغيندا.

جۇمانين شاهي سرداري،

ائله، گۆنه هاواداري،

بير قدم باس بيزه ساري،

بركت وار آياغيندا.

آشيق مئهدي

(1838-1905)

گرايلي

سنسيز

ديلبرا، سن گؤوهركانسان،

مرجاني نئيله‌رم سنسيز؟

جاهاندا مطلبيم سنسن،

جاهاني نئيله‌رم سنسيز؟

اير اولسا يوز اوزو گول،

دانيشسا دا يوز شيرين ديل،

كؤنول اولماز يئنه ماييل،

من آني نئيله‌رم سنسيز.

مئهدي‌نين ديلبري سنسن،

ديلي‌نين ازبري سنسن،

سرداري، سروري سنسن،

سولتاني نئيله‌رم سنسيز.

عاشق قوربان آغدابانلي

(1846-1933)

گرايليلار

دولانا-دولانا

بولبول ايديم، گوله حسرت،

قالديم دولانا-دولانا.

بو جانيمي عشق اودونا

سالديم، دولانا-دولانا.

نظر سال ديدم ياشينا،

يانديم هيجران آتاشينا،

صدقه‌‌ يارين باشينا

اولدوم، دولانا-دولانا.

چكديم فيرقت جفاسيني،

هاچان سوردوم صفاسيني؟

جان دئييب، جان قاداسيني

آلديم، دولانا-دولانا.

آرتيب درديم گونو-گوندن،

اللي ايسه اؤتوب ميندن.

قوربان دئير حسرتيندن

اؤلدوم، دولانا-دولانا.

(1825-1935)
گرايليلار
بۆلبول
قارلي داغلار آشا-آشا
گۆل اۆستونه گلن بۆلبول.
تر قؤنچه‌يه قوْندو قارغا.
گۆله حسرت قالان بۆلبول.
باخماميشام ياراسينا،
ازل دردين چاراسينا،
قێزيل گۆلون آراسينا،
قاناديني سالان بۆلبول.
بيري گۆلدور، بيري چيچك،
بيري-بيريسيندن گؤيچك،
آشيق رجب دئيير، گئرچك
كؤنلو قمله دوْلان بۆلبول.

دوللو مصطفي
(اون دوققوز عصر)
گرايليلار
صنم سني
گؤردوم سحر بولاق اوسته،
صنم سني، صنم سني.
خالق ائيله‌ييب عجب نسته،
صنم سني، صنم سني.
دويماق اولماز قلم قاشدان،
سنين كيمي باغري داشدان،
سئچممه‌ديم ياشيلباشدان،
صنم سني، صنم سني.
آغ اوزده خالي بنؤوشه،
كؤنول حسرت يومرو دؤشه،
آختارير گؤزوم هميشه،
صنم سني، صنم سني.
گول جامالين بديرلي آي،
قاشلاريندي قورولو ياي،
ائيله‌مه‌رم دونيايا تاي،
صنم سني، صنم سني.
اسكيك اولماز، گؤزل، خاتان،
دول مصطفي سنين بوتان،
وئرمز منه ظالم آتان،
صنم سني، صنم سني.

آشيق مۇسا

(1830-1912)

گرايليلار

بير گۆن

كؤنول، سندن گيلئيلييم،

ياخشي-ياخشي يازار بير گۆن.

ايكي ميرقززب ايلشيب،

چك اليندن هازار بۇ گۆن.

ائي يۆكو تۇنج اوْلان كيمسه،

ناغديسي وئج اوْلان كيمسه،

نۆتفه‌دن كج اوْلان كيمسه،

دوْغرو يوْلدان آزار بير گۆن.

يازيق مۇسا ائيلر ديلك،

بۇ قم قوْيماز بيزي گۆلك،

دئمه‌ديممي چرخي-فلك،

بۇ دؤورانين پوْزار بير گۆن.

باغبان محمّد

(1835-1914)

قوشمالار

اويناسين

باشينا دؤندويوم ييغيلان جانلار،

ميننت ائدين قددي چينار اويناسين.

دوشوم آياغينا، دؤنوم باشينا،

بئلي نازيك، گوموش كمر اويناسين.

او دسته ديلبريم سؤزدن كوسمه‌سين،

رحمين، شفاهتين بيزدن كسمه‌سين،

اؤزگه‌لر كؤشكونه قدم باسماسين،

قلم قاشلي، گؤزو خومار اويناسين.

عاشق ميننت چكر يارين عشقينه،

پروانه‌لر يانار نارين عشقينه،

باغبان دئير: بير نيگارين عشقينه،

نه اولار كي، او بختور اويناسين.